拜年教傻仔一鑊：世界很簡單 人類很複雜

話說家中排最細嘅傻仔去好日唔返大陸鄉下拜年，返到去咪跟家姐尾，去人屋企啦。
長輩乜叔問起大家嘅動向，由大到細問落去：「伊家做緊咩丫？」
傻仔準備好個答案，就等佢問到就答佢，點知佢忽然變陣問：「你啱啱畢業喎，你係邊家畢業呀？中文大學？浸會大學？」
咦…傻仔個間未係大學喎，然後傻仔唔經大腦，係出於謙卑，亦係非常真心坦白咁講：「下，我個間好垃圾咖喎…」
全場哄笑之後，乜叔繼續問：「垃圾都有名姐，即係邊間呀？」
「ｘｘ學院。」（識傻仔或者睇過下傻仔嘅野都知係邊間，都唔洗開名啦～）
乜叔：「是在香港的嗎？」
「是在香港的。」
「都好，有讀張文憑都好。」
傻仔心諗：雖然話垃圾…但都唔係文憑，都叫做係文學士課程下…但傻仔無解釋，因為傻仔覺得無需要向一班十世唔見，可能係最後一次見嘅親戚解釋咁多，實在唔介意佢地誤會。
之後傻仔求其「嗯嗯」無解釋咁應左佢地就算啦。

事後，一位在場，本身同傻仔好close 嘅親友話:「你頭先講錯野喎，你唔洗咁貶低自己咖！」
然之後講一尐傻仔當時無留意到嘅野，例如佢地點樣炫耀自己，聽到傻仔原來咁垃圾個樣係幾不屑……
傻仔心諗有冇咁誇張呀，諗多左咋？但傻仔當時又確實係唔經大腦，恰如其名。
不過就算佢地真係睇唔起傻仔都無所謂啦，十世唔見同可能係最後一次見嘅親戚，理得佢姐。反而令傻仔在意嘅係伊位親友嘅提點。佢嘅說話就好似有個黃子華將你塞入的士之後，同你講一句：「世界好簡單，人類太複雜。」
有人在意佢地嘅地位，在意佢地嘅面子，然後猜度來猜度去，見人講人話見鬼講鬼話，波譎雲詭Feel得來，重要咁真實揭露出人類本性嘅醜惡，個下先得人驚同灰機！

傻仔諗左好耐：一直以為率直真誠，又唔係黑心鬼，待人處事應該都Okay 卦？點知咁成咁，係唔係傻仔太傻呢？
最後傻仔有個idea，如果有機會再見，佢問到不如話自己乞緊食，咦，觀賞下佢地嘅反應都好喎！你蔑得越勁，我越有成功感。

你以為伊個故事教你：世界好簡單，人類太複雜，叫你做人唔好咁簡單咁直？
No啦~ 就係因為你咁唔簡單，咁多顧忌，先令人類太複雜。
世界好簡單，點解人類唔可以簡單尐？？