加油呀！你一定可以成為一位好出色嘅怪獸家長！

食完野緊係去畀錢，但係收銀櫃檯冇收銀員。一個三歲左右嘅細佬，拎住張單係櫃檯前面行來行去，似係等屋企人。

係伊個時候，如果你係我，你有兩個選擇：

A: 繞過個連單都唔夠高放櫃檯、亦唔似會有錢畀嘅細佬仔，直接埋收銀到等收銀員過來
B: 排係個細佬嘅後面，等唔知邊個屋企人亦唔知幾時過來，一定要佢地買左單先，先到自己

我就揀左A，唔係我唔尊重個細佬，係我唔覺得佢係負責買單嘅人。

收銀員埋番櫃檯，我已經放晒啲錢係檯面，啱啱好唔洗找。

係伊個時候，港媽就出現，一手搶過細佬手上個張單隊過來櫃檯，同收銀話：「係我地先咖喎。」

我當堂忍唔住反白眼反到上天花板，心諗：「阿太，你洗唔洗咁趕呀？」

咁算啦，反正唔洗找，錢又早已經放低左，佢咁趕我又無謂個人棟係到，阻住趕時間嘅港媽啦，咁我咪秒速離開啦。

之後港媽補插一句：「伊家啲人咁無禮貌。」

我唔知佢話我無禮貌係指我無同收銀員講ByeBye？定係因為我無同收銀員講唔該？因為我由反白眼到走人，我只係用左一秒，唔好意思我唔可以係一秒時間內，調整到心情再同收銀講聲唔該先走。

不過，我估佢應該都係計較我「打左佢尖」，而繼言我無禮貌。

其實我有幫伊港媽諗過，話唔定佢係想俾個小朋友學畀錢呢！雖然佢連單都唔夠高放上櫃檯，但正如伊家三歲小朋友都要去理財工作坊啦！係咁嘅話，咁我又真係打左個細佬尖，我唔啱喎！一定係咁，除非唔係。

我建議佢下次伊種情況，可以咁樣同我伊類咁無禮貌嘅廢青講：「唔好意思我教緊小朋友畀錢呀，但你打左佢尖。」我相信我會立即拎返起啲錢彈開，排去佢後面，再暗讚伊位家長真係好識教仔。

不過，如果你只係派個小朋友行來行去，就代表自己排緊隊，然後飛出來講「係我地先咖喎」想爭個一兩秒……我望一望佢嘅小朋友，我忽然領會到，斤斤計較其實係伊位港媽嘅天賦同潛能。如果我再見到佢，我伊個無禮貌嘅廢青一定會同佢打氣：「加油呀！你一定可以成為一位好出色嘅怪獸家長！」